0 KHUA HMUNLOH DI NEIH ZAWNG By Eddie Lalawmpuia

Thrallai a ni a, Kolkata khawpui pawh boruak a thiang nuamin khawlum lutuk pawh a zia khawp mai. Howrah train station lam pan chuan taxi in ka tlan phei vauh vauh mai a. Rangkachak khur awmna a ruka hria ni awm tak chuan train station lam chu phur tak mai hian ka pan ding vang vang mai a. Ka helhhawlh nge ni kan in atranga staion inkar chu reilote chhungin ka va thleng ta a. He Howrah train station ngeiah hian alawm khawvela ka hmangaih ber leh ka duat em em chuan kan khua (Kolkata) lei lung a rawn rah dawn avanga ka phur em em nachhan chu. Tichuan train arrival chu dar 3:00pm a ni a. Dar 2:30pm velah ka va thleng a, waiting seat ah chuan ka va thru ta ran mai a. Sana chu a kal muang duh ngei, mai dar 2:30 leh dar 3:00 inkar hian vawi 15 vel chu ka sana bunlai Timex hlui tawh tak hi ka en hman hial a ni. Tichuan dar 3:00 a rik hnu pawh chuan a chuanna train hming reng reng chu a la rawn lang si lo. Enquiry lama ka va en lahin Howrah Mail tih train hming reng reng ka hmu bawk si lo. Call kan tum thin a, not reachable a ti zel bawk si a.

Tichuan train an delay hnu ah chuan ka mobile ami hlate chu kan ngaithla vel a. Nizan lama ka menrei deuh avangin hla ngaithla chung chuan kan muthlu leh ang lawp lawp bawk a. Rei vaklo hnu a kan thrangharh leh hnu chuan dar 4:00pm a lo ri der tawh mai a. Train lah a la rawn thleng bawk si lo, ka ril a tram deuh avang chuan pawnah eng eng emaw ka va ei leh hnuhnawh a. Chutia thil ka ei lai tak chuan ka mobile chu a rawn ri ta  ral ral mai a. Kan pickup chuan “ Khawiah nge I awm”, hi a rawn tita a. Ka thil ei lai pawh chu ei chhunzawm tange pawh ti chuanglo chuan ka paih ta nal nal a. Platform no. 22 lam pan chuan ka tlan phei ta vang vang a. Kan zawn kan zawn hnu chuan a rawn lang veta hlawl mai a. Hun rei tak chhung kan inhmuh tawh loh avangin ka lawm em em mai a. Ral atranga a hmel ka hmuh rikngawt pawh chuan ka taksa chau takte pawh chu a chhawk dam sawng sawng hian ka hria.

Howrah train staion atrang chuan kan in lam chu pre paid taxi chuan kan pan phei ta a. Chutia hun reitak chhung kan inhmuh tawh loh hnu a kan han thrudun leh ta mai chu mumang ram lama thil tawnte pawh a ang duh angreng khawp mai. Tichuan kan inah chuan hun reilote chhung a rawn khawsa ve a., hlim taka awmdun chhungte nuam ti hle mah ila, hlim nite hi a van reilo thin tak em. Khatia a lo cham hun chhung zawngte kha mumang ang lekah a chang zo leh ta si a.

Tichuan a truanna mualah chuan liam zai a rel leh ta a. Hmeichhia amah chauhva rel a chuang leh tur chu ka ngaih a ngam thei thlawt loh avangin a awmna hmun thleng chu thlah turin ka in puahchah veta a. Train ticket-te kan han lak fel hnuah Shalimar train station atrang chuan kan thrianpa chuan min vai liam ta a. Kan train chuanna Shalimar Express hi amuang  em em mai khawpa. Zanlai dar 12:00 vel atrang chuan Kharagpur train station ah chuan zing dar 6:00 theng kan han ding ta tehreng a.  A hreawm duh khawp mai a vawt angreng bawk si a. Atuk nileng chuan kan tlan ve leh ta boh bohva  Kan train chu dar 6:00pm vela Wardha thleng tur anga kan beisei a ni a. Kan tum dan phei chuan ka thiannu pawh chu hostelah a lut hman chiahchiah turah kan beisei a. Mahse kan train tlan muang lutuk chuan kan beiseina leh ruahmanna zawng zawngte a ti sukuk zo ta vek mai ani.

Dar 6:00pm  thleng tur chu dar 10:00pm ah kan thleng ta heu mai a. Rilru a mangawng duh hle mai. Ka return ticket tur lah chu la print loh ani bawk si a. Kan thlen veleh hmanhmawh baklengin station atrang chuan cyber café lam panin kan tlan tan ngat ngat a. Cyber café awmna hmun kan va thlen chuan a lo inkhar reng tawh mai bawk si a. An hostel lamah kir leh dawnin gate dar 7:30pm ah an closed bawk si a. Tichuan engpawhnise chaw ei phawt ang tiin dawr pakhatah chuan an neih ningnawi tete ang chu kan han ei ta a. Ril a tram tawh bawka kan chawhmeh fahrah hle mahse ka ei hnem ngei mai.

Chutia chawte kan han eifel hnuah chuan Dar 11:00pm lai a lo ri der tawh mai a. Wardha train station chhungah chuan khawvar nghak tur chuan kan han thru veta ringawt mai a. A hma zan lama lo mut thrat loh nen tlaivar chu ka huphurh angreng khawp mai a. Ka thriannu chu a chau  deuh bawka thutthlengah chuan a mu bam mai a. Ka han en thina, mutmu tuahrem na tha pawh awm lova rem leh rem lova thrutthlenga an mu bam mai chu ka lainat angreng khawp mai a. Mahse tlaivar chu huphurh hle mah ila tlangval hriseltha zekzawk han nih chuan ka han tlingtla ve leh mai a. Train station bul vela thingpuite kan han inharh hnu chuan ka thiannu chu an hostel lam pan tur chuan a insiam ta a. An hostel lama ava in tih fel fai hnuah min thlah leh turin kan inchah leh bawk a.

Tichuan keimahte chuan train station ah chuan ka tei rak rak mai a. Dar 8am vela a lo let leh tur chu nghakhlel tak chuan ka tei kual ka tei kual a. Ka ticket lah waiting list ah ala awm bawk si. Print chhuahloh a la ni zui.Buaina hlirin min zem kual vel bawk nen. Chutia ka inngaihtuah ka in ngaihtuah lai chuan ka thrinnu pawh a rawn lang ve leh ta hlawl mai a. He mi truma a hmel ka hmuh tluk zeta ka lawm zia leh nidanga ama hmel ka hmuh tawh zawng zawngte khaikhin chuan hemi truma ahmel chu a la duhawm ber mai awm e.

A sei lutuk loh nan short cut zung zung tawh mai ila. Ka train chu dar 11:00am a chhuak tur a ni a. Reilo te chhungin a rawn thleng veta mai a. Hreh tak leh huphurh tak chuan kan inkalsan a ngai leh dawn ta si a, tlangval pumpa e tilo chuan han trah vak mai chu a chakawm duh hle mai a ni. Amaherawh chu thil tih chi lah ni hek suh. A ni pawh a hmel ka en khan a lung a chhia tih chu hai ruallohin a hmuh theih a. Tichuan inmangtha leh vang vang tur chuan kn inkalsan leh dawn ta chu a ni a. Trainah chuan ka lawn ta a. A kal ta ruai ruai mai a. Rel tut ri ruah ruah nen lungchhe tak chuang chuan Wardha train station ah chuan kan inthlah liam ta a. Vawiin ni thleng hian a hmel mawi tak leh nui mawi tak mai te chu ka hmu leh ta lo chu a ni si a.

Ka train chuanna ah chuan seat la neilo tih takah chuan a awl awl ah chuan kan thru veta tawp tawp mai a. Nagpur kan thlen chuan seat awl pakhatah chuan ka insawn ve leh a. Reilo te hnuah chuan chhungkaw pakhat an fate nopang te te pahnih nen hian ka bulah hian an rawn thru ve a. Ka thrutna chu an mahni chhungkaw seat chu a lo ni reng mai a. An fate chu English hian an inbe zet zet reng mai a. An seat a awm ve reng ka duh avang chuan advantage a lain kan be nel chho vela. An fate nen chuan hlim takin games te kan khel vela, amaherawh chu dar 11:00pm vel chuan an chhukna tur ah chuan an chhuk ta a. Rei tak chu an bulah chuan ka thrut ve theih phah ta a. A lawm awm hle a nj. Tichuan an chhuk veleh chuan an seat ah chuan ka mu ta nghal a. Amaherawhchu darkar khat vel zenzawn ka mut hnu chuan  TTE chuan min rawn kaithova “heihi I seat a nilo”  a rawn ti ta a. Keilah ticket mumal nei bawk silo chu rel chhungah chuan mutna tur zawng chuan k tei ka tei ta mai a. Lung a leng bawk nen a va han hreawm duh tak em. Mahni chauh chuan toilet bulah te chuan ka tei rak raka. Achang leh mi mutna ah te chuan arukin ka va thru ve thul. Hmangaihna kawng hi chu a lo van chhukchho tak em …… A hma zanah ka lo tlaivar tawh bawk nen ka taksa a chau bawk si. Chutah ka lungleng lutuk chuan min tichau tel bawk nen. Chutia hreawm ti taka ka tei ka tei hnuah chuan zing lam dr 3:00 velah hian chhungkaw pakhat hi (Eng train station nge pawh ka hre tawh lo)  an chhukthla ta a. Rang zet mai chuan an mutna ruakah chuan ka mu veta a. Min rawn hau leh anih pawhin pawisak nei lek tawh lovin seat awl ah chuan ka mu leh ta hmiah mai a. Kan han thrang harh leh meuh chuan dar 10:00 a lo ri der tawh mai a. Harh pawh harh eih lo chuan ka lo muhil a lo ni a. Ka ngaihthalo chuan ka bag leh wallet-te kan check vat a, a lo la kim thlap a ka lawm khawp mai. Tichuan nileng chuan chu seat ah chuahn inti senior leh  thu tak chuan ka thru ta vah mai a… Nilengin kan han tlan leh ta ngat ngat a. Hun hi a van rei duh vawng vawng tak em. Ka Duat khan enge a tih ve ang aw…? Tihte ngaihtuah reuh reuh chuang chuan ka thrutna ah chuan ka rilrute chu ka kawm a. Mobile ah lah signal a la awm bawk si lo. Kolkata thlen thuai thuai chu ka chak tawh kawp mai.

Tichuan nilenga lungleng tak leh khawhar taka kan thrut leh hnu chuan tlailam 3:00 ah Kolkata chu kan lut veta a. Vairam mah nise mahni chenna nge nge han thlen chuan thla a muang huai maia,  in thlen vat vat ka chak tawh hle mai. Train station ka thlen veleh pre paid taxi ka la a kan in lam chu ka pan ta vang vang a. Khua hmun lo D neih zawng a  lo van hreawm bik tak em, Karmah hla se damtakin aw tiin kan inthlahliam a lo ngai leh thin si a.

“KAR HLA DI ZUNA UAI CHU

TUAR THIAM A HAR NGEI KA TAN

DAR ANG TAWN LEH NI NGHAKIN

ZAN MU RENG KA CHHING THEI LO”