0 Lehkhathawn by Jeffrey-a Pa

Dear,

            Ramtuk thla laihawl kan chuangkai a, thalai zawng zawng mai hian tunhma lam zawnga engah mah ka ngaih lem loh Valentine’s Day chanchin an sawi an sawi ta mai. Tu tu te emaw in he Ni lo pian chhuah dan chanchin kimchang an ziah te pawh ka chhiar fo tawh a, ka benga rawnga ka lo thun loh avangin tun thlengin eng vanga heti teh hluaia vei ta nge maw kan nih tih pawh ka la hre ta chuang lo.

            Mahse, mi hrang hrangin he Ni lo thleng tur chungchang an sawi leh ziah tak sekah chuan kei, nupui fanau neia inkaikawi duah tawh pawh hi ka danglam miah lo, ti ila chuan dawt ka sawi ngei ang. Zep lohah chuan eng emaw ti takin ka danglam ve deuh tlat.

            Chuvangin, zawnglai tana he Ni pawimawhna niawm chu rinthu talin ka thlir thiam ve deuh roh a, hman pui tur nei lo leh riang ta viauah pawh inngai ta la, ka dem lem lo che. A chhan chu, kan tlangval lai khan he Ni hi lo hre ve tawh ni ta ila chu, a hmang uar ber berah ka tang lo vang tih tunge sawi thei?

            Mahse, ka tih leh hram teh ang. He Ni lo thlen dawn hnaih avang maia khawhar lutuk leh mal lutuk bik anga i inngaih chu ka phal hauh lo. I hmangaih em em nen tunhnaia in tualthu a chhiat deuh tak avanga lungngaia kun ngawih ngawih tur pawh i ni hek lo. I vanduaina lam ringawt i thlir reng chuan i inngaihtuah ngut ngut ang a, khawvela mi vanduai ber emaw i inti ang a, tul loah mittui i seng ang a, i thinlung a rum fo ang.

            Chuvangin, a eng zawngin thil han thlir ve mah teh aw, damdawi inah damlovin pawisa tam tak senga ‘oxygen’ a hip kawk kawk laiin pawisa sen pakhat pawh chawi lovin boruak nuam tak hip tur kan la nei a, hawna tur nei lo mi tam tak khawlaia an riah mai mai laiin nang chuan ‘kan in’ tih tur i la nei a. “Ka nu leh pa leh unaute” tih sawi tur nei miah lo khawvelah mi tam tak an awm laiin nang chuan i nei a, chu mai bakah thian i la nei cheu bawk.

            Engah nge mi pakhat vanga i lungngaih viau reng a, i indawmkun reng le? Chan loh tur na na na hi chu chelh ngheh kan tum poh leh kan kut atanga tal pit tumin an tang nasa thin. Chuvangin, chhuah zalen mai i la, an tan a nuam a, kan tan pawh a thawven thlak zawk asin. Tha ber nia i ngaih aia tha zawk hi i la tawng leh mawlh ang, tih ka ring tlat.

            Chuvangin, “Chhum dum chhah tak phenah hian Ni eng mawi tak a awm a, thing hnah a tlak kawlh hian hnah thar a chawrno dawn tihna a ni a, Fur khawdiak tak hi Favang hmahruaitu a ni,” tih hre reng la, i tuang tichhahin hmalam pan tum zawk ta che.

            Engpawh ni se, hlimin an sawi Valentine’s Day chu kawppui nei miah lo paw’n hman tum ta la, hmang nuam inti tak tak, a  hnu lawka an hman nawm lutuk avanga inchhira mittui tla leh si te ai chuan i hmang tha phawt ang.

Lo dam vawng vawng phawt mai teh aw.

Jeffrey-a pa

110220122124