0 ♥ TRUE LOVE ♥ by Râlte Kta

Ṭum khat chu tlai awh tak mai ah hian Jim-a chu rui tak chungin a hnathawhna atangin in a haw a. A ruih em avangin nikhua pawh mumalin a hre hleithei lovin a kal pai nawk nawk a. An sitting room a tar mawi leh hun mawite chu nek tla keh chuai chuai a, chhuatah te chuan a luak ngei nguai mai bawk a. A nupui Annie chuan a tlu tur chu ven pahin Jim- a chu a theih ang angin a pawm bet a. Khumah chuan a mut tir a. A luak te chu a ti fai nghal sawk sawk bawk a.

A tuk zingah chuan Jim-a chuan a hma zana a awm khaw loh em avangin, a nupui Annie chu a thinrim a ring rilru hle mai a. A khum atang chuan ṭhu chhuakin an pahnih inkara intihthiamlohna a thlen loh hram theih nan a ṭawngṭai nghal mawlh mawlh a. A ṭawngṭai zawh chuan choka lamah chuan inthlahrung ru angreng takin a va phei ta a. An choka dawhkan chungah chuan Annie hawrawp ngei mai a thu inziak lehkhathemte hi a hmu nghal a. Chutah chuan, hetiang hian a lo inziak a. “Duhtak, tukin zing tukṭhuan atana I ngainat ber chi kha dawhkanah hian peih sa diamin ka lo dah sak che a. Kan sitting room cheimawina, tarmawi leh hunmawi te lei turin ka chhuak lawk dawn a. A hma thei ang berin nangmah vang liau liauin ka lo haw leh thuai ang… Nangmah hmangaih leh thlahleh ngawih ngawihtu che, I nupui, Annie’tiin. Chutia a rin loh dan deuh a Lehkhathem inziak a hmuh chuan Jim-a chuan mak a ti hle mai a. A pafa hnenah chuan eng thil chiah nge khami hma zan a thleng chu a han zawt chiang ta a.

A fapa chuan, “Ka pa, nizan a rui taka I lo haw khan engmah I hre chang lo va. Ka nu chuan khumah mut tir tum che in a theih ang angin lo pawm bet che a, I kawr haklai leh pheikhawk bun lai te a phelh sak lai che khan I ruih em avngin ka nu kha hmeichhe dang emaw I tih avangin he thu hi ka nu bulah chuan I sawi ta a,’Nang hmeichhia, min kalsan rawh, nupui duat leh hmangaih em em pawm lai nei ka nih hi!!!’ tiin I sawi a” tiin a pa chu a hrilh a ..